நிலாவின் வலைப்பதிவில் இணைய இதழ்களைச் சிலர் இளக்காரமாய்ப் பேசுவது பற்றி எழுதியிருந்தார். அங்கு எழுத ஆரம்பித்துக் கொஞ்சம் பெரிதாய்ப் போனதால் அதைத் தனிப்பதிவாகவே இங்கே பதிந்துவிட்டேன்.

அச்சு இதழ்களின் ராஜ்யத்தில் ஏற்கனவே கொஞ்சம் பிரபலம் அடைந்த எழுத்தாளர்கள் மட்டுமே பிரகாசிக்க முடியும் அல்லது பிரகாசிக்கும் வாய்ப்பிருக்கும் சிலரால் மட்டுமே அதில் எழுதமுடியும். அச்சு இதழ்களுக்கு மாற்றாய் இன்றைக்கு இணைய இதழ்கள் மாறிக்கொண்டு வருகின்றன. அனைத்துப் படைப்பாளிகளுக்கும் வாய்ப்புக் கொடுத்து நிறைய எழுத்தாளர்களை உருவாக்குவது இணைய இதழ்களால் மட்டுமே முடியும். அச்சு இதழ்களாலும் முடியுமென்றாலும் அதற்கான வாய்ப்பு மிகக் குறைவு. 20 வருஷத்துக்கு முன்னால் இணைய இதழ்கள் வந்திருந்தால் இன்றைக்கு ஆயிரக்கணக்கான எழுத்தாளர்கள் தமிழில் இருந்திருப்பர், குறைந்தபட்சம் தரமானவற்றை வாசிக்கும் மக்களின் எண்ணிக்கையாவது அதிகமாய் இருந்திருக்கும்.

தமிழில் வலைப்பூக்கள் வந்த கொஞ்சநாளில் எழுத ஆரம்பித்தவர்களின் எண்ணிக்கை நூற்றுக்கணக்கில் பெருகியது/பெருகிக்கொண்டிருக்கிறது. இந்த எண்ணிக்கை ஆயிரக்கணக்கில் ஆகும் நாள் வெகுதொலைவில் இல்லை. இந்த ஆயிரக்கணக்கான பேர்களில் தொடர்ந்து பயிற்சிக்கும் சில நூறுபேர்களாவது திறமையான எழுத்தாளர்களாய் வருவதற்கான வாய்ப்பை கொஞ்ச நாளிலே நாம் காணமுடியும்.

இணைய இதழ்கள், வலைப்பதிவுகள் பற்றி இளக்காரமாய்ச் சொல்லப்படும் வார்த்தைகள் இணையஇதழ்கள் ஆதிக்கம் செலுத்த ஆரம்பித்துவிடுமோ என்ற உள்மன அச்சத்தின் விளைவாய் வந்தவையாயும் இருக்கலாம். புதிதாய் ஏதாவதொன்று வரும்போது அதை இளக்காரமாய் மட்டம்தட்டிப் பேச முயல்வது சகஜம்தான். பிரகாசிக்கும் எழுத்தாளர்கள் சிலர் வலைப்பதிவுகளையே கூட இவ்வாறு இளக்காரமாய்ப் பேச முனைகிறார்கள். எது நிஜமென்று, குறைகளை மட்டுமே பூதக்கண்ணாடி கொண்டு தேடாமல் தொலைநோக்கில் சிந்திக்கும் எவராலும் உணரமுடியும். எழுத்து, இதழ்கள் எனப் பொதுவாழ்வில் அனைவரின் கருத்துக்களையும் சீரியஸாய் எடுத்தால் யாராலும் எதுவும் செய்ய இயலாது. உண்மை என்ன என்பது இணைய இதழ்களைப் பொருத்தவரை மிகத்தெளிவு. இப்போதுதான் தொடங்கியிருக்கும் விதயம் இது என்பதால் குறைகளும், இளக்காரமாய்ப் பேசுபவர்களும் கொஞ்சம் அதிகமாகவே இருப்பார்கள். அதிலுள்ள உண்மையை இணைய இதழ்களை நடத்துபவர்களும், எழுதுபவர்களும், அதை அக்கறையுடன் படிப்பவர்களும் அறிவார்கள்.

இணைய இதழ்களும், வலைப்பதிவுகளும் முக்கியமான பலவற்றைச் சத்தமில்லாமல் செய்துவருகின்றன. படைப்பாளிகளுக்கும், வாசகர்களுக்கும் இடையேயான இடைவெளியைக் குறைப்பது அதில் முக்கியமான ஒன்று. வாசகனின் கருத்தை படைப்பாளியை எளிதாய் எட்டச் செய்வது இன்னொன்று. இன்னும் பல நேரங்களில் வாசகர்கள் சக எழுத்தாளர்களாய் இருக்கிறார்கள் என்பது இதன் சிறப்பம்சம். இவற்றால் எழுத்தாளர்களுக்கு சில அசௌரியங்கள் கட்டாயம் இருக்கும், அதனால் சிலருக்கு இதுபிடிக்காமலும் போகலாம். எழுத்துலகில் தனிமனித வழிபாட்டைக் கிள்ளித் தூர எறியப்போவது இணைய இதழ்களும், வலைப்பதிவுகளும் என்பது ஆழமாய்ச் சிந்திக்கும் எவருக்கும் புரியும். சிலர் இவற்றைத் தவிர்க்கமுயல இதுவும் ஒரு காரணமாய் இருக்கலாம். ஆக, இத்தகைய நடைமுறைச் சிக்கல்களும், வசதிக்குறைவுகளும் எழுத்தாளர்களுக்கும், படைப்பாளிகளுக்கும் மட்டுமே; இவற்றால் தமிழுக்கும், இலக்கியத்துக்கும் மிகப் பெரிய நன்மைகள்தாம் நிகழப்போகின்றன.

| சுட்டி | Posted By Muthu | தொகுப்புக்கள் சில |

| | |